“Me komprenas ke ca decido surprizigis a preske omni ma esas matura decido pos intensega reflekti e remarkante la solideso di nia granda amoro e di la komuna projeto quan ni komencas. Me esas jurnalisto de me esas yunega e til l’evo di 31 me laboris entuziasmoze, iluzionoze, harde. Sammaniere me afrontas, to quon ni komencas, responsante, iluzionoze e kun vokeso por servar a la Hispani. Dankego.”

La Spozin-demando eventis ye la jovdio 6 di Novembro di 2003, koram la Palaci di la Zarzuela e la Pardo.

Pos unesme celebrir formala ed intima ceremonio en la Palaco di la Zarzuela, cirkum la dekedu e duimo dil pasinta jovdio 6ma, la princulo Felipe e Letizia Ortiz ekiris, ridetanta ed interprenanta sua manui, la Rejala Palaco di El Pardo -loko explicite selektita da la duo- por sua unesma posturo kom mariajonti oficala. La dio, sunoza e lumoza, akompanis la feliceso di la yunini, qui kurte promenis dum 5 minuti tra la gardeni, montrante omnamomente granda parolemeso -Letizia ne cesis susurar vorti a sua fianculo- ed amorantala kompliceso . Letizia esis splendida, vestizita per simpla e blanka pantalon-vesto da Armani,: la jako, sen kolumo, klozita per tri butoni, e kun “kamenala” dekoltito, on dicas ke lo
ya esis elua stilo. Sualatere, Sinioro Felipe portis obskura kostumo, klara kamizo ed ultramara kravato. 350 jurnalisti, de 150 komunikala moyeni e de 12 diferanta landi (ultre la Hispani, esis multa Germani e Franci) akreditesabis por kaptar imaji pri ca historiala evento, qua anke asembligis nombroza kuriozi apud la Palaco di El Pardo.

Pos la kurta promeno tra la rejala gardeni, la duo eniris la palaco, konkrete la klinata korto di le “Austrias”, ube nove posturis por la fotografisti e respondis emocoze la questioni di la jurnalisti. La granda questiono pri l’exakta dio por celebrar la rejala mariajo ne solvesis. «Ni ne ankore savas la konkreta dato. Finante printempo, komencante somero...»,
dicetis la Princulo. Pose, li fiere montris sua donacaji. Siniorino Letizia portis en sua sinistra manuo un bela blanka ora ringo e brilianti. «Moderna desegnuro», cainstante dicis, amuzante, la Princulo. Por diferar de la du Rejidini, Letizia volis esar plu originala e ne donacar la kustumala posh-horlojo, e preferis donacar a Sinioro Felipe safira e blanka ora jemeli., dal juvelisto Suárez, quan il montris nervoze ed emocante. Ultre ci donacaji, la duo komunikis ke, pose, en la intimeso, donacobis altri . «me donacos elu familiala juvelo, koliaro de perli e safiri», deklaris la Princulo. «La mea esos literaturala juvelo» -deklaris Letizia-. «Tre bela libro di 1850 da Mariano José de Larra, qua esas kavalierala historio dil XVma yarcento ».

Pose on saveskis la titulo: «El doncel de don Enrique, el doliente», quan Letizia selektabis, precipue, pro ke olua autoro, Larra, esabis jurnalisto.

La mariajonti ne cesis interchanjar komplicoza regardi, afeciona gesti e komenti (precipue, de Letizia a Sinioro Felipe) dum sua konversado kun la jurnalistaro, demostrante koram Hispania ke la sua esos mariajo pro amoro, la sorto de mariajo ke la Hispana populo, sendubite , deziras por lua heredanto.

La princulo emfazis sua futura mariajo kun Letizia signifikas « precipue, kontinueso, lo posibligas durar la dinastio ed unionigas ni a la Historio. Ultree, lo posibligas me adjuntar ago a mea laboro favore la Hispani. Persone, lo supozas suportego, pro ke elua qualesi e valoro esos esencala e fruktifos» . Respondante ka Letizia definitive cesos sua laboro kom jurnalisto, la Asturiasano explikis ke «de hodie esas evidenta ke mea profesionala laboro finis». Ma, sequante, elu dicis ke ne livos quik TVE, ma progresante, por pokope kustumar su pri sua rolo kom futura Rejino. Tamomente, eventis amuzanta anekdoto. Letizia ne ankore finabis sua diskurso kande la Princulo interruptis lu: «Laboro ne mankos ad elu, elu esos tre okupata».«Lasez finar», elu emfazis, lo ridigis la asistanti e demonstris ke Letizia Ortiz esas libera muliero, ferma, qua savas decidar ipse.

Ne mankis la questiono pri qua qualesi vidabis l’un a l’altru por amoreskar su. «Esas multi evidenta por omni -manifestis la Princulo-. Ultree,. sua eloquenteso e sua inteligenteso, sua responsiveso en sua laborado, sua kurajo. Elu havas principi, yusteso ed exempleso en sua laborado qui sempre impresis me e, de me konoceskis elu, ankore pluse». Letizia remarkis pri ilu ke «il esas ne-ordinara homo. Il esas tre respektema, tre racionoza, inteligenta, esas granda lektemo, persono qua esforcas kreskar interne e havar opiniono pri la mondo tre yusta e solidara» .

Pri quale li konoceskis su , Sinioro Felipe simple dicis: «Ol eventis plu kam un yaro ante nun. Ol esis hazarda renkontro sen efekti. Ni entamis plu granda kontakto en printempo e to fruktifis». «quale Princulo deklaras sua amoro?», questionis audoze la jurnalisto Josep Calabuig. «Quale amoranta viro», respondis Letizia, emfazante ke, ultre esar bona interviuvisto, elu esas plu bona interviuvata. Quankam ankore esas balde, ulu questionis la Princulo pri ilua decendantaro.

Koram la surprizoza e stuporoza facio di Letizia, Sinioro Felipe respondis serchanta la komplicoza regardo di sua amorata: «La intenco esas plu kam 2 e min kam 5 ». Sequante, la Reji eniris la korto. La Princulo, prenanta la manuo di Letizia, anke prenis la manuo di ilua matro, la rejino Sofía. Lo esis komplicoza preno, serchanta l’acepto pri ilua, sendubite, bona selekto. Pose, unionesis a la Rejala Familio la genitori di Letizia, Jesús Ortiz e Paloma
Rocasolano, elua fratini, Telma y Erika; David, kuzo di Letizia ed ilua spozino; la rejidi Elena e Cristina kun sua rispektiva spozi, la fratini dil Rejo e sua familiani e la princino Irene. Kune e felica posturis por la historiala fotografuro dil oficala kompromiso di nia heredanto, olqua, certe, signifikis plu modernigar la Hispana monarkio. Pos finir la oficala posturo, la duo retrovenis al Palaco di la Zarzuela, ube eventis intima repasto kun sua rispektiva familiani.

Fonto: Revista Pronto

La Princulo Felipe e Siniorino Letizia iris ye la 11ma di mayo di 2004 a la Madridana staciono “Atocha” por depozar reda rosaro e blanka e reda diantaro memorante la 192 viktimi e pro solidareso a la vunditi.

Siniorino Letizia portis nigra pantalono e pastelea jako da Chanel . Pose, la duo vizitis la publika skolo “Ciudad de Valencia”, situita en la Madridana quartero Santa Eugenia ube sis infanti, di qui genitori mortis pro l’atenti dil 11ma di marto di 2004, studias. Pos kelkete posturar koram la fotografisti e televizion- filmisti la duo eniris la skolo ube vizitis la skolo-chambri, salutis a docisti e lernanti, , vidis la laboruri dal lernanti, signatis autografi, e mem sideskis kune la infanti por desegnar. Pos finir la vizito, qua duris til la 13:30 kloko, li livis la skolo, inter la lauta voci ed afecioni de la lernanti, quin la vizito multe iluzionis. Extere, li duris prenar la manui di la nombroza vicini de Santa Eugenia qui vartis li an la pordi dil edifico.

La gala dineo eventis ye la 21ma di mayo di 2004, en la Palaco di El Pardo ed esis 345 invitanti

Akompanata dal Princulo, Siniorino Letizia ekiris la oficala automobilo kande maxim forte pluvis sur Madrid. La Princulo kovris elu per parapluvo til ke li du atingis la kovrita ponteto a l’eniro dil Palaco, ube recevis l’invitanti unope. La manu-kisado duris preske un horo, e Siniorino Letizia montris su varmega embracante sua quar avi. Pos la saluti, la invitanti komencis manjar.

Siniorino Letizia portis platinea kostumo de naturala silko desegnita da Lorenzo Caprile. Elu arivis portanta *shantung-a kostumo de platinea naturala silko e fitilo de “Chantilly”, brodita per arjentea griza lapidaro, qua lasis sua shultri deskovrita e remarkis la juvelaro de platino, safiri, perli e brilianti (orel-ringi e koliaro) olim di la komtino de Barcelona, matro dil Rejo, quan Sinioro Juan Carlos e Siniorino Sofía donacis a Siniorino Letizia ye la dio dil spozin-demando. Siniorino Letizia anke portis artizanala abaniko inkrustita per perlomatro e burso de filigrano quan apartenis a la rejido Isabel de Borbón, "la Chata"

MENUO:

Pos plura apetitigivi, on servis l’unesma disho konsistanta ye viteli de blanka asparagido Tudela kun somerala trufio ed supo. Sequante lotao kun minto, e la triesma konsistis ye Iberiana “ravioli” de tomato e vinagro de
Jerez. La menuo kompletigesis da pektoro de dindo en milda marinado per reda vino kun limona pureo e desero qua esis chokolado, kokoso e reda frukti kun sorbeto de citrus-frukti. Pos la kafeo on servis "mikra folaji" de la kazino de Madrid, qui inkluzas: bonbono de kardamomo, chokoladala e mandelala glaciajo “Gaudí”, minta folio, "air baguette", chokolada bonboni e vafleti. La apetitigivo ante repasto, akompanesis da du blanka vini, Clarión, Viñas del Vero, garantiato pri origino e qualeso Somonano e Milmanda de Torres, da Conca de Barberà. La kolekturo 125 de vineyi Chivite, blanka de Navarra, e la reda vino Matarromera, garantiato pri origino e qualeso Ribera de Duero, esas la vini qui akompanis la dineo, qua finobis pos drinkar M.R Moscatel de Málaga.